2009年7月31日 星期五

小蘋果


今晚約Fiona行街、食飯
佢問我可唔可以整蘋果酥佢食
哈~蘋果酥咁易整當然無問題,整半打比佢

Fiona好鍾意食麥當當蘋果pie
其實我都係
麥當當我只會食蘋果pie,其他都唔食
有d人最怕係食蘋果pie

每個人喜好都唔同,自己鍾意點就點,駛乜理人咁多啫

其實蘋果餡好易整

將蘋果切粒,用牛油或橄欖油炒香,加玉桂粉同2茶匙砂糖炒一陣就ok呢




2009年7月28日 星期二

慶合合


成幾個月無炸過嘢,只有一種味道會令我開油鑊
就係…咕嚕
無錯!又係佢

跟本就係癮

呀sir.....我咕嚕癮起呀

但今次係魚!咕嚕魚

雖然我已經差唔多90%唔食豬肉,但係咕嚕魚好似代替唔到咕嚕肉

今次個汁我加辣椒絲,切辣椒絲後我洗完手準備切另一樣材料
點知..........晌我唔為意一刻
手指掂到塊臉,然後塊臉成晚乾柴烈火慶合合足一晚
洗完臉都係熱辣辣.....Ya Ya

噢!




2009年7月27日 星期一

推推推


出呢篇時,我應該晌街

至少去番 jill stuart 買 bath collection

是日放假

乜都無做過,只係等鐘點姐姐上屋企

其餘時間晌度.....瞑想......又名....發呆

琴日大少爺晌便利店買雪條返屋企,令我好開心既雪條

係馬來西亞製造既榴槤雪條啊!好濃榴槤味,食完好開心既味道啊

仲要係$4一支咋咋咋咋咋咋,送個得戚的哼~~~比大少爺先~

試下啦啦啦啦啦啦啦啦啦啦啦啦




大少爺試既芋頭,都好香芋頭味呢




唔記得


今日朝早舊地重遊...好開心

然後出CWB

之前晌jill stuart買 bath & body collection比CC做生日禮物時
都已經比佢既香味打動
打算落去買set比自己
點知我落到CWB熱到乜都唔記得
到返到屋企沖涼時先記得,跟住就沮喪足一日

下畫就清理下個雪櫃,好想整個甜品比自己

跟住就做一個焦糖蘋果酥比自己同大少爺share




後面呢杯係提子果茶,晌日本旅行時買

但又唔記得點解會買?買來做乜?




發現自己越來越無記性啊!

2009年7月23日 星期四

試下先


就快又開始忙,所以晌我仲得閒既日子就試多d唔同既嘢
下半年又再忙過
今年得2個月係得閒

又係718
718 gathering Amy個弟婦整口水雞
試完我又好想試

之後不斷搵食譜,最後晌網上搵到江獻珠女士既口水雞食譜
二話不說就照跟
出來效果都好好啊
而且佢有加芝麻醬,多一分芝麻香呢

好期待大少爺放工啊

咁早整定係希望隻雞同個醬汁有多些交流







隻雞最重要浸冰水啊!

第一次斬雞,仲要去埋骨呢!雞翼同雞脾我無去骨




焗花生,唔駛用咁多油去炸

個醬汁最好隔一隔花椒呢




食譜:

浸雞料:

花椒    2湯匙
紹酒    2湯匙
薑        3片
鹽        1湯匙
蔥        2條

雞洗淨;煲滾約1,000克水(以蓋過雞面為準)
水煲落薑蔥、花椒包、酒及鹽,水再滾落雞,雞胸向下
水再煮滾後轉細火,蓋蓋焗煮約15分鐘至雞熟。
大盤內加入冰水及冰塊,移雞至盤內,擱至冰溶及雞身變冷。

辣汁料:

油              2湯匙
花椒          1湯匙
紅尖椒      3隻 (去核切片)
蒜頭          4粒 (剁茸)
頭抽          3湯匙
芝麻醬      1湯匙
辣椒紅油  3湯匙
糖              1湯匙
白醋          2湯匙
麻油          2茶匙
鹽              1茶匙
冷開水      1/4杯

辣汁做法:

鑊置中火上,落花椒炒至香氣散發
油2湯匙,加入紅尖椒及蒜茸略爆移至大碗內
按次序下頭抽、芝麻醬、辣椒紅油、糖、白醋、麻油、鹽及冷開水拌勻

將醬汁淋上已斬件及去骨雞件上,灑上蔥粒、花生、芝麻




今日工作仲未完架!我仲煲緊冬瓜水,今日大暑啊!




我唔理!聽日乜都唔整去行街~~

2009年7月22日 星期三

易借


話說 718 gahering食到一個好好味既雞翼,係 笨B媽媽整既串燒
有煙肉京蔥卷、同京蔥雞翼
我覺得個配搭好好味
就嘗試整比大少爺試

我就用照燒汁京蔥雞翼
做法易過去借火同借荊州

將雞翼去骨略醃,放入京蔥,入焗爐封錫紙焗熟
然後掃上照燒汁,焗一陣反轉再掃一層汁
焗到乾身
done

京蔥熟後會有甜味,無晒辛辣味呢
反而會令雞翼有少少京蔥香味

呢個值得一試,哼~~~~~




2009年7月21日 星期二

風後


時光倒流先!

話說718生日會,唔覺mini整食物
但明明佢又有叫我幫佢切牛油果
原來後來大家飲飽食醉佢就無整到

但分一半材料比我
咁我就帶番屋企

當時我真係有一絲煩惱,我諗…個風好勁咁
又吹到正
又必打無疑
又乜乜物物
咁我帶材料返屋企後,打風開唔開鹹牛肉呢?

夜晚我聽緊移美移動無耐就八號風球
好快入睡
到一點被呼呼呼既風雨嘈醒
又話9號風球

點知一覺醒來,變番3號風球
但見到出面仍然橫風橫雨,點都無奶油落到街

噢!好彩仍有mini比我既材料

登~登~~~~~~

牛油果雞肉配芥末籽汁三文治

芥末籽醬加少少沙律醬,否則會太酸,但又唔加得多

成為風後之午餐呢!




2009年7月17日 星期五

恆心


話說我6月尾開始再跳funky dance
但係覺得半個鐘好似無乜效果,連汗都流少咗
之後烏GG話佢家姐出去gym度跳,效果好好,每堂45分鐘
我打算出去報名學,點知...呢個星期自己晌屋企每日跳45分鐘,效果開始明顯
而家打算7、8、9月晌屋企每星期跳5次,每次45分鐘

到秋冬就出去學,咁就keep住有運動
一到秋冬就無晒恆心,出街學先會keep到

有邊間gym有funky dance堂係好既,可以介紹下呢?

自從減少食紅肉,每晚諗餸更加難諗
煮魚比煮雞既多
但係唔想經常蒸魚

見到笨B媽媽無論FB、blog都推介鯖魚
引起我好奇心去試
用鹽醃好去煎,噢!效果唔錯!
都幾鍾意啊!

又多個選擇呢!用我既玩具LC pan煎油都唔駛點落啊




我跟潘老師既碟跳,商務都有佢既碟賣

http://hk.myblog.yahoo.com/Delicatessen-ivanbee/article?mid=44124

2009年7月13日 星期一

一籠燒賣


噢!今日我們這一家又見面
好開心啊!
最開心係.........就是不告訴你

專登早少少落埋西灣河買燒賣皮

目的當然係整燒賣啦!大少爺好鍾意食燒賣

所以我一直想整

到返到屋企即刻開工

整完好開心!係成功既

不過…張相夜晚影,好難影得好

落蟹籽落得多得滯添




before蒸

整好可以放冰格保存,又可以定型




before 包 餡係豬肉同蝦,我唔食冬菇所以無加呢

燒賣皮(黃皮)可以去賣粉麵既舖頭

↓呢隻碗都幾唔應該上鏡,呢隻係豬肉碗,每逢醃豬肉都用呢隻呢




2009年7月11日 星期六

1~2~3~事


今日天氣、時晴、時雨、時光、時暗

但無變既係......好熱

不過...Hungry eleven卻有件喜慶事

呀茄畢業禮啊!當然要齊人去賀下佢啦!

哈~聽日又再影,呀茄你自己帶定道具喇!聽日無人會理你架

1~2~3~~~~~~ (唉~我部細機質素好似差左)

呢札花係Hungry Eleven送既!唔該晒呀mini、愛飛、阿繼去買花啊

我地成班圍住呀茄..................影札花

仲喝佢:咪郁啦!影緊呀

哈哈




呢札呀茄家人送既呢







Hungry eleven今日只能短聚,唔怕,下星期又見

臨走前幾位成員落金滿堂"嗒糖"

其中既芒果棉棉冰




榴槤棉棉冰




噢!味道生活有介紹我本書啊!謝謝


20090710125419129_0001_r2_c1.jpg picture by kklvb


2009年7月10日 星期五

鑽芥


繼菠菜同西瓜後..............

近日愛上芥末籽醬wholegrain mustard

尤其自己整煙三文魚三文治時,更加鍾意落d做調味

每逢我愛上一種味道,就會不停諗有乜可以整

今次就整芥末籽蜜糖燒雞腿,今次係測試版

都好成功啊!咁下次就可以整燒全雞呢!燒雞又多款口味啊

其實同燒雞同一醃法

但係唔要香草,加上芥末籽醬,差唔多燒好時就搽蜜糖

配上caesar salad就係我既午餐呢..............哼~~~~

鑽芥=鑽研芥末籽醬既各式食法!

芥末籽醬有芥末既香味,但無辣味,所以唔會辣架!




before baking






2009年7月7日 星期二

4人 @金田日式放題


早幾晚大少爺話佢同事介紹TST一間日式放題餐廳都唔錯

然後大少爺就訂位今晚去食

再然後大少爺 2個妹打比我約行街
因為我接到電話時已經行緊街敗家中
我就叫佢地兩個一齊去晚飯

一行四人去食放題叫到成枱都係

呢度$188 +10%一位,各樣都幾ok!

而且份量由自己控制,你想要幾多就叫幾多呢

但我見議4個人叫2件share先試下,因為太多選擇
每人預樣樣都一件就會好飽呢

好彩我兩個姑仔 join埋一齊食,否則試唔到咁多食物試呢

飲品另外加$10一支




有剌身、壽司、沙律、燒物、炸物、鍋物同鐵板燒

剌身、壽司類:

剌身都幾新鮮,尤其赤貝啊!壽司我無食,佢哋話都ok呢




燒物:

羊架一般啦!燒鯖魚、燒魚餅都幾好、秋刀魚同燒薯蓉元貝都幾好




鐵板燒:

牛柳粒...好得!好juicy又淋!好味

三文魚...我唔鍾意個汁啊




炸物:

天婦羅、芝士年糕、炸生蠔呢幾樣都唔錯!

仲有炸乜乜物物,我無影呢




煮物:

泡菜豆腐鍋...好味

關東煮...我只食左蘿蔔都好味

豬骨拉麵....得大少爺食得落

炒雜菜一般




甜品...都幾好味既抹茶甜品




金田

其實我覺得適合一班人食、座位都唔逼

而且一大班人會叫得更開心

Hungry eleven................我地搵次一齊去吧!




念念


呢個星期又忙於去街,我話過7、8月黃昏後先約我
果然所有約都晌禁區時間後
不過...呢輪我唔覺得特別熱,因為又成日落雨

表弟先生提起.........今年未打風啊
得喇得喇!得閒誇戚戚風呢

噢!早幾日晌EXP試過海鮮長通粉,覺得好好味啊

念念不忘之下,自己又試

用罐頭蕃茄去做汁,夠濃味

再加調味、茄膏、tobasco、鹽、蒜蓉、香草仲有乜乜物物

試下試下比我試到差唔多味啊!

下次要加埋西芹碎同紅蘿蔔碎我諗會一模一樣呢

哼~~~




2009年7月5日 星期日

烏龍賀艾美


今日賀 艾美(エミ)微型世界 既 Blanc Maison開幕

係一間集合手工、、日本雜貨,仲係一個課室呢

白色簡潔既裝修好舒服,我同幾個blog友都虎視爐具

諗點樣可以晌艾美樹煮一餐

一直以來我都好鍾意儲re-ment迷你食玩,直至玻璃櫃不能容納
有時我會諗…咁細既玩具點整既呢
直至見到艾美既迷你食物,覺得靚過re-ment外,仲驚嘆艾美有一雙巧手啊

Vanlily問我有無興趣去艾美新店開張
我唔止想去,仲好想整個Quiche去賀呢

影完以下張相,一個濕滑既主人,將一個粗心大意既Quiche跌到體無完膚
果一種無語問蒼天既感覺,歷久不散
嗚~~~~~~




幸好,之前有批底剩,我打算整幾個細既比大少爺

最後拎住4個咁大把出去

收拾殘局後,由化妝、到化完妝、都係傾盤大雨,連落街截的士都有困難




以下係艾美送比賓客既禮物,好精緻啊 (相片copy 艾美)




我買咗幾塊日本小布,其實我實會去睇多次,今日太多人無辦法遂一細看呢

前面隻小匙係我揀既小禮物,後面係留比vanlily既




Vanlily最後有事唔嚟,好彩我仲識Agnes

仲有新相識既貓姐、查查、同joyce nice to meet youuuuuuuuuu
哈!我哋話咁快就開始細聲講大聲笑~仲係笑得好大聲果隻

一齊分蛋糕食

仲見到Johnny同Rachel,超級開心啊


艾美(エミ)微型世界 恭喜晒啊!

重聚@EXP


一年無同咪咪吉見面,一年後好似經歷好多咁

不過...有經歷係好事呢

我地先行又一城,主攻家品、化妝品、衫,然後去EXP食晚飯

呢兩杯係荔枝薑梳打同蜜桃梳打




海鮮長通粉!呢個好味啊!我要試整呢




軟殼蟹pizza

都好味!我覺得佢個pizza起碼好味過 peter 吉




呢三杯分別係芝麻、古力同原味creme brulee 都唔錯!




邊食邊傾!EXP食物都幾OK

咪咪吉新屋入伙時,我會送番第一本書比佢鎮宅

粉紅色當通勝用..........丫嘛!哈哈

當然第二本佢會買啦啦啦啦啦啦啦啦~~~~

2009年7月2日 星期四

作反


今晚大少爺唔晌屋企晚飯

我可以作反,整平時佢唔鍾意既食物

大少爺唔熱衷既食物,我就唔會整
只會等大少爺唔返來食飯既時候先會整呢

大少爺唔喜愛既磨菇忌廉湯
佢唔鍾意忌廉湯
但我又好鍾意!所以呢個列入一個人晚餐既首選

配上A1合桃小法包,我極鍾意呢個包

係最鍾意既麵包,實在太好味喇!

夏天唯一個好處係接近7pm個天仍然好光,影相都仲有自然光




呢個係蒜子百里香燒羊架

係跟梁安璞既食譜整
非常好味
個蒜子先烚五分鐘,再加落用牛油沙糖煮既糖漿
蒜子食既時候係甜甜地,有焦香既味道
配羊架好好味
羊架好嫩,非常滿意

原本有打算整creme brulee,但諗諗下都係唔整喇!
比自己休息下
大少爺未返前可以funky dance、然後敷個mask呢




2009年7月1日 星期三

雙雙敗@東來順


每隔幾日就晌facebook擴散敗家風氣

好鍾意朋友寫呢個comment比我,哈哈

今日又同大少爺出TST行街

行完街就去食晚飯,週圍都應該多人,諗唔到去邊度食

就去帝苑酒店既東來順碰碰運氣,好彩有位

呢間上年大少爺生日食過,都唔錯!而且環境舒服、服務都好呢




好味既牛肉生煎包,後面係三鮮窩貼,大少爺好鍾意個窩貼啊




蔥爆羊肉




呢個......我睇餐牌時見到..  半隻片皮雞$210

咁我咪叫囉!

點知係...四寶片皮雞,佢既雞我唔覺得有半隻

But...有炸魚、炸蝦丸、同脆羊肉、仲有窩巴,其實整體都好味




百頁小棠菜




其實我覺得呢間好好味,係會令人記起既食店

如果黃油蟹當造,食以下菜式仲好,鶴影蟹湖

呢個係旅遊發展局既得獎菜式

攝於上年




食完飯行去 車,碰見笨B媽媽,晌佢生日碰見佢,好幸運呢