2007年4月30日 星期一

試一次便夠


琴日整既粉果得到【精神領袖】大少爺激烈讚賞
今日朝日佢 seminar後放半日,原本話約我食Lunch
但我叫佢返屋企,因為今朝再包粉果(今日包粉果已經變成係好容易、無難度既事)
仲將韭菜餡料整埋"咸水角"
我好耐無炸過嘢,有差唔多3個月,為咗再比驚喜佢就開鑊
當然......再得到佢既激讚啦!
個皮唔難整但好難包,我整既好似隻餃
雖然都係一樣既韭菜餡但同粉果感覺好唔同啊!
除餡料有分別同街外食既一樣味呀!好皮好好味
不過只會整一次!試過自已做得到就滿足


好似酒樓一樣,咬開入面有空位架!


唔好問我炸完野既油點?、嘥油、又油煙呀咁.......
我覺得久唔久整一次係唔過份既

2007年4月29日 星期日

"潮門夜宴"練習篇の粉果


我既【精神領袖】大少爺就快生日
註:我覺得用丈夫形容佢係唔夠,佢的確係我既【精神領袖
我要親自整潮洲菜比佢,雖然都係簡單既菜式,但我都要做到最好
要由頭盤到主菜都係我用心做成
一直諗頭盤有乜好,就以韭菜粿為目標,結果就整咗以下既韭菜粉果
好開心!好成功
雖然澄麵好難攪黏黏的,攪到亂晒籠,但都有幾件見得人,仲好好味!
我有啲想喊,好感動既粉果,我居然整到粉果
呢兩日由外地來家人去澳門玩,我有兩日得閒要向難度挑戰,整咸水角
我知我遲早有一日整蝦餃,因為又有一包澄麵粉喇!
舊既粘米粉、糯米粉未消滅仲要又多一樣


用澄麵好有彈性又較黏而且要用不黏布蒸,因為好易黏碟
  
食譜、做法
韭菜   $4
免治豬肉  $5
蒜頭一瓣剁成蓉
豬肉醃味:生抽、雞粉、糖、胡椒粉、酒、麻油、粟粉各適量
將豬肉加蒜蓉醃好攪至起膠
將韭菜拖水再浸冰水榨乾切粒、加少少雞粉撈勻(此舉可辟去韭菜既青味同會惹味d)
五分鐘後加入已醃豬肉攪勻
醃共30分鐘至1個鐘

皮材料及做法參考自:
韋太烹飪教室
原食譜係煎既韭菜粿,但我蒸及做粉果型,變成粉果
1)澄麵 75g、生粉50g、鹽1/4茶匙
2)滾水 200g
3)油1茶匙  (原食譜用固體菜油,但我用橄欖油代替)
做法:
A.將(1)放入大碗內,用(2)滾入撞入快手用筷子攪勻,蓋上蓋子靜止5 mins
B.將油加入用手搓至光滑無粉粒
C.將適量皮用棍壓成圓形入餡料,蒸8~10分鐘
Tips:
蒸既時候最好用不黏布墊底蒸,無咁易黏碟
每個粉果要留有空位,因為蒸時會發大,怕黏埋一堆
唔好碌皮太薄,否則易穿
如果皮太黏,可以用糯米粉做手粉,糯米粉唔會令粉糰變硬

2007年4月27日 星期五

甜版本


要招呼家人,呢幾日比較忙呢!
呢個係甜薄撐(中式pancake),其實同鹹薄撐做法相似但材料有啲出入
食落似pancake,但餡料只會加沙糖、芝麻、花生、椰絲
但我只加沙糖同芝麻
初初無期望過好食,目的係消耗屋企中剩下既糯米粉、粘米粉
但食落又幾好食、又易整!!!
要煎到脆身就更好,用易潔鑊既好處係唔加油烘熟,或只需要用好少好少油
係一個無乜難度既甜點




2007年4月25日 星期三

豐收約會


今次終於成事,慶祝亞B生日約食飯
有主角亞B、Vanlily、笨B媽媽、珍妮仔 
可惜我因為要接待外地返嚟既家人,只可以遲啲到
但因為好難約齊五個所以點都要如期舉行
我無一齊食,去到佢哋已經食晒
我哋幾個加埋產生化學作用,係笑得好嘈,期待下次gathering
To:春、夏、秋、冬多謝你哋手信、多謝亞B生日令我有得食冠軍級蛋糕!
食到Vanlily既朱古力蛋糕,內藏榛子,好濃朱古力味,勁好味呀



今次去灣仔 Al Dente,我多數去Soho區嗰間,灣仔第一次
裝修、格局都同Soho差唔多

春、夏、秋、冬同共進晚餐
以下相片copy自...笨B媽媽

交換手信
珍妮仔送比我既針織畫,好靚啊
仲有 handcream,仲係我用開既 Crabtree & Evelyn
你真係好醒架



笨B媽媽送既飯殼、同Lemon Grass,我好鍾意lemon grass
醃雞同豬頸肉好味

Vanlily送既,有澳門手信鳥結糖、同迪士尼罐裝花生
(
我晌其餘3個睇唔到既時候就拎走minnie喇!唔好話比佢地知)
仲有一樣但唔夠光聽日補影

我送比佢哋4個既手信,晌池袋既Loft買,原本唔止本薄仲有零食
但返到來發現唔夠手信、加上大少爺一不留神咁食咗
所以.........我就整芝麻餅補數
呢幾本薄係以佢哋平時既表現而買
左手邊第一本低係送比將Cream當飯食既Vanlily
隔離本係送比亞B,覺得好似佢做既蛋糕
下面左手邊第一本係送比珍妮仔比較鍾意中式所以送糰子比佢
隔離本送比笨B媽媽既,佢話過豬係利佢又成日畫個豬樣遮佢既相,而且佢都鍾意摷雪櫃(絕對不含扁意)


仲有補飛既芝麻脆餅





農村的孩子上學去


今日大少爺去拎信,收到【重返校園計劃】既一封信
信內容係...唔需要再資助小童上學既學費
因為溫家寶總理承諾:【要讓每一個農村的孩子上學】
中國政府在全國人大會議上宣報落實九年義務教育,免除農村學生學費與雜費
係一個喜訊,令人興奮既消息
中國會有更多更多小孩可以讀書、可以識字、能夠得到教育
我同大少爺有一點失落
以後就唔可以每年都收到受資助既小童"柴方慧"既親筆圖畫及成績表
從一開始我就打算一直供到中學畢業,而家就有中國政府直接供給
我衷心祝福"柴方慧"繼續努力讀書,好好珍惜學習機會
把握機會改善生活,努力呀!
一齊睇下以往既成績--->  成績表 1               成績表 2







帶給我快樂回憶既兩幅圖畫



過多兩個月就可以收到"柴方慧"受資助期內最後一份既成績表及圖畫
等待-ing

2007年4月24日 星期二

天黑黑 (附食譜)


紅色暴雨警告又天黑黑,但對我影響唔大
因為鐘點姐姐嚟,今朝早咗起身未致於被雷劈醒
我被大少爺下咗【禁街令】(即係禁止出街及落街),免得我又攝親
不過…聽日有家人從外地嚟我就要出去接佢哋去酒店,仲要陪食飯
夜晚另有gathering添
所以呢兩日我就盡情晌屋企玩麵粉
個砵仔糕琴日下晝整既,我要盡快消滅粘米粉同糯米粉
見到小魚仔早幾日整砵仔糕,就燃起整砵仔糕既念頭
不過…我呢個係簡易版呢





食譜:
水(A)      250ml
黑片糖     1.5片
粘米粉     120g
粟粉         60g
熱水(B)   250ml
紅豆 隨意         (需事先煲淋)   
做法:
1.  水(A) 加黑片糖煮滾,待片糖完全溶解後,熄火待涼
2.粟粉、粘米粉拌勻加入已待涼片糖水攪勻,用篩隔一次去粉粒,做成粉漿
3.熱水(B)撞入粉漿攪勻,入碗仔(我用muffins 盤)
4.大火蒸兩分鐘加入紅豆,再蒸10分鐘 (
如唔加紅豆直接蒸10~12分鐘)
Tips:
粉漿入碗前需要經常攪拌,粉類易沉澱
紅豆晌蒸後兩分鐘表面凝結先加入,因為太早加入會沉底,



2007年4月23日 星期一

三角形的午餐 (附食譜)


三角形的午餐,其實全部都係剩餘物資
過年既時候整各類糕點剩餘好大包粘米粉、糯米粉
早兩日又剩一札韭菜,所以就動手整韭菜薄撐(其實我唔知點解叫薄撐)
經我改良後覺得幾好食,又易整喎


以下內容經專人長期訓練,切勿模仿
我本身有遺傳扁桃線發炎,爸爸有、哥哥有、家姐有、我唔執輸都有
一發炎就會發燒,我特別奇怪,一發燒會燒成個星期、甚至半個月
唔止屋企人頭痛,連帶家庭醫生見到我都頭痛,無論打針、食藥都唔退燒
最嚴重當然要留醫啦
我本身飲好多好多水,但每次發燒就調番轉唔飲水覺得口好淡
咁醫生就提議我食西瓜因為多水份,自始之後西瓜係我既發燒良伴
當然唔好亂試,每人體質唔同
今日我已經好番,但就食埋剩下既西瓜
成份午餐都係摷屋企既物資而成既~仲係全部三角形


薄撐食譜:
糯米粉      4湯匙
粘米粉      2湯匙
雞湯           適量  (可用雞粉加水)
麻油 、 胡椒粉 少許
餡料隨意,可以用
韭菜或者用香蔥蝦米
做法:
糯米粉、粘米粉加雞湯攪勻,加入自選餡料、麻油、胡椒粉攪勻就可以煎
Tips:
 (要自行調較雞湯份量,想脆身就加雞湯至糊狀、想軟身就加多少少雞湯)



2007年4月21日 星期六

有無韭菜呀? (附食譜)


今日完全退燒,但食藥令我無精打彩,腳軟軟咁
一諗到大少爺鍾意會【韭菜豬肉餡餅】就有動力
好成功呀!比上次  牛肉餡餅  更成功
今次有經驗做到皮薄、韭菜豬肉味又夠香,連唔鍾意食豬肉既我都覺得好好味
因為過幾日我家人從外地返香港旅遊要陪下佢哋,唔得閒
我趁有時間實習下,我得咗喇~Yeah!!!!!!!!
_____________________________________________________________
因為覺得值得推介,所以寫晒做法
寫完用盡氣力好 攰呀 
↓皮薄




餡皮食譜:改自 (
午茶點心)
原食譜水份較多好黏,我今次減到以下份量覺得OK
以下係10個份量
麵粉 ﹦180克
熱水=125ml     (我自已用90ml)
凍水=60ml       (我自已用45ml)
做法:
1)麵粉放入盤中,加80度熱水 攪勻
2)分2~3次加入凍水,攪勻後搓至光滑唔黏手
3)放入另一個已搽油既盤中,蓋上濕布靜置20分鐘
4)靜置後再略搓至長條型,分成8~10份,碌成圓形包餡整形
5)用煎餃方法煎
貼士:
整型時,可於枱上、麵棍、手灑上高粉防黏
包好食唔晒放冰格,可以防止肉汁滲出整穿餡皮
↓熱水加入麵粉成粒狀       、 加入凍水至糰狀                                   
 
↓搓至不黏手 靜置 20分鐘   、  帖板或工作枱灑上高粉防黏                     
 

↓碌薄皮入餡料,收口時拉出多餘皮 、 剪走多餘皮,否則好厚影響口感
 


牛肉餡做法:
買免治牛肉,用生抽、糖、胡椒粉、粟粉、酒、麻油調味
加入洋蔥粒,攪或撻至起膠,放入雪櫃30分鐘備用
如果唔鍾意洋蔥可加入少許冬菜

韭菜豬肉餡:
韭菜輕輕拖水、榨乾、切碎
買免治豬肉,用生抽、、糖、胡椒粉、粟粉、酒、麻油調味

加入一瓣剁碎蒜頭及韭菜粒,順一方向攪至起膠
入雪櫃30分鐘備用

煎餃方法:
燒熱鑊加油,慢火將餡餅煎至金黃
加入少許開水,蓋上鑊蓋焗至水收乾,再煎至乾身上碟
_________________________________________________________

我應承下次見Cindy整韭菜豬肉餡餅比佢帶返屋企食
To: Cindy
我會記得整比你唔可以落酒去醃,我記得架

2007年4月19日 星期四

值得等的午餐


花近一個鐘既時間整自已既午餐,但值得
我自已見到都忍唔笑,係由內心開心發出既笑
係牛肉餡餅
好多肉汁,唔敢與清真牛肉館作比較,但非常非常滿意
我相信自己一定會再將佢變種
一定會整大少爺鍾意韭菜豬肉、白菜豬肉、粟米牛肉、素菜etc........






                                              
餡皮食譜:改自 (
午茶點心)
以下係10個份量
麵粉 ﹦180克
熱水=125ml(我自已用90ml)
凍水=60m l(45ml)
做法:
1)麵粉放入盤中,加80度熱水 攪勻
2)分2~3次加入凍水,攪勻後搓至光滑唔黏手
3)放入另一個已搽薄油既盤中,蓋上濕布靜置20分鐘
4)靜置後再略搓至長條型,分成8~10份,碌成圓形包餡整形
5)用煎餃方法煎
貼士:整型時,可於枱上、麵棍、手灑上高粉防黏


2007年4月17日 星期二

與Cindy 的約會


今日同 Cindy 約會,晌Apm食下午茶
我地相約好耐,但到今日先見到,好愉快既一日
不停講講講、笑笑笑,係non stop咁講
我仲講咗好多我同大少爺既爆笑實錄比佢知添!
最攪笑係我眼睫毛較長,搽 mascara後上下睫毛經常纏住
(我本身唔搽mascara,眼尾位睫毛都係上下重疊,互相纏住)
導致我經常要用手撐番開,否則隻眼會撐唔大,cindy見親我呢個動作都笑
To:Cindy
你要記住我同你既共同目標,每月一Hea呀!
↓呢張相片由cindy提供



Cindy送比我既禮物,多謝你呀!


 

2007年4月16日 星期一

時間、人物、地點


事發時間:上星期某一晚
事發地點:同一間屋既飯廳
主角人物:大少爺、大少奶
關鍵:粟米魚、飯
話說晌屋企男主角係唔鍾意食碟頭飯,佢要飯還飯、餸還餸
但當晚女主角就好想食碟頭飯可以洗少隻碗
 女主角問男主角用碟食好唔好?從男主角表情已經知道答案
結果
同一張餐枱有一個就有一碟菜、一碗飯、一碟粟米魚、另一個就獨自食一碟粟米魚飯
(重點係兩個人都係食一樣食物喎)
食完女主角就返入廚房洗大堆碗碟
不過....其實女主角內心係開心既~因為男主角既奄尖凸顯到女主角既本事!哼!!!!
↓女主角碟飯


↓男主角碟餸


To:大少爺
我隻手洗碗洗到粗晒喇!係你將我對手既命運改變架!
不過…你含辛茹苦養我,呢d又何足掛齒呢?