2007年2月28日 星期三

悲觀人


今日無明成皇后睇,趁機出去補給屋企用品、買餸
因為鐘點女傭下晝來,今日繼續無得行街
不過都趁開門時間,挽住兩袋餸衝入shu uemura買咗支落妝油
跟住行去搭小巴既時候見到一個手持拐杖行動好慢一步一步行既老伯迎面而來
佢咀角流血咬住一舊已染血既棉質物體,又不停有血晌嘴滲出
當時我望一陣,行過之後忍唔住回頭望個老伯,期間好多人經過老伯身邊
但都望一望就行過,我當時就轉身望住嗰位老伯
我晌度諗:佢到底咩事?佢會唔會係撞親?佢會唔會好痛?
流血流得多會暈架喎!佢係咪吐血呀?
之後本能反應想搵警察幫佢,但又見唔到 (因為爸爸係警察,我自細潛意識覺得警察係萬能)

跟住我居然跟住呀伯尾,又見唔到警察、又怕佢突然暈
終於忍唔住行埋去問:
呀伯!你有無事呀?
個呀伯氣如洪鐘答我:我脫完牙呀!
跟住我話:你唔係整親係脫牙?
個牙伯答我:係呀脫牙
我見佢口咬既係牙醫紗布,就同佢講:你要唔要紙巾呀?
呀伯答我:唔駛喇!我有!
咁我就放心地同佢講:咁好啦!你小心呀!小心呀!拜拜!
呀伯:哦!拜
我就好放心咁走,其實因為我悲觀,凡事向壞處諗,往往都會想到最壞
好彩大少爺較樂觀,永遠耐心咁解釋事情並唔係咁差
好彩個呀伯無怪我多事!可能呀伯都會諗:0車!我脫牙之嘛!大驚小怪
________________________________________________________________
返到屋企用殼麥包整吞拿魚三文治,仲有熱檸水
好鍾意殼麥包,有碎合桃、麥,好好味呢
今晚又試整新發明,努力呀



2007年2月27日 星期二

彈~彈~彈


琴晚獲膩回吐兩次後,今日原本想出去行陣街睇春季衫、鞋
但都要除消。。。。被大少爺禁出街,留晌屋企休息
大少爺鍾意食中式食物,我就決心學整西米糕
我將食譜改良過,好彩得咗!
原本食譜用豆沙,我就用吉士,本來想整奶皇但禁出街無得買鹹蛋
原本食譜要年蒸西米我就 skip呢個步驟,更易做
我為免再獲膩回吐,只可以食一件



用好彈牙西米,真係好掂
呢隻西米浸一個鐘都唔爛仲非常彈牙,good~
蒸完都仲見到一粒粒 (吉之島有售$5.9一包)
  
食譜:
材料 
西米  200g  
糖      50~ 80g
生油   1湯匙    (我用橄欖油)
豆沙   或其他餡料隨意  

做法:
1. 先將西米浸1小時,沖洗乾淨,瀝乾水分,加入糖和生油攪勻。

2將西米攪勻就可以直接放入蛋撻模上,撻模一定要掃油
步驟:第一層西米, 第二層餡料,第三層西米,按平表面。

3. 大火蒸25分鐘或直至全透明熟透

撻殼一定要掃油,否則難脫模,但薄薄一層就得,否則好油膩
用橄欖油感覺好啲,可以用普通生油
原本食譜要先蒸西米至半生熟,但我直接入模蒸都一樣得,仲更易做
如果好似我咁用吉士,就要做好吉士糊後入冰格雪至硬生切粒,易入餡

2007年2月26日 星期一

牛魔王福音


今晚有飲宴-ing,自已整午餐
除咗咕嚕肉及一般香腸、煙肉、火腿外,基本上唔多食豬肉
自從學識整漢堡扒後…簡直覺得係牛魔王既福音
漢堡扒係新寵兒、易做又好味!
由於今晚飲宴要成晚上九點先有得食,所以午餐就整大份啲
有炒意粉、黑椒洋蔥汁漢堡扒、蕃茄、粟米配低脂沙律醬
↓唔小心整到個沙律亂晒,噢!


↓原本個沙律幾靚樣

漢堡扒做法 --->  
按此觀看
_________________________________________________________________
下午茶:未食架!貪得意影埋先!
有飲宴就有餅咭、有餅咭就有西餅、有西餅就有"荷蘭pie"(個蛋糕既名真係叫荷蘭pie)
件荷蘭pie個底係pie、面係蛋糕、配每日都要飲既綠茶


2007年2月22日 星期四

唔好咁浮誇既晚餐


原本大少爺既同事來拜年,但改為下星期
今晚表弟嚟 食飯,睇開我blog都知道係嗰位非常受我同大少爺歡迎既貴賓
當我問佢想食乜?佢居然答我:【表姐,今次唔好食得咁浮誇】
最後…佢只點選三樣,其實每次佢嚟都唔算食得浮誇,只係佢唔想我不停整
相反每次去舅父屋企,舅母都會煮好多嘢比我食,我呢啲只屬小兒科呢!
佢雖然細我十個月,佢對我同大少爺都非常好
就算我整得好與唔好都欣然接受、唔會彈三彈四、唔會嫌多嫌少
起碼見到我哋會有聲稱呼、都會識講句唔該、多謝
更加唔會連用米奇利是封都要干涉兩句
門面說話起碼會令人接受,我唔係要人奉承、我要求既只係普通禮貌
之前既晚餐-->  表弟晚餐 1       表弟晚餐 2
表弟下午茶
晌 italian tomato買既蛋糕條,表弟同我鍾意芝士
大少爺就朱古力啦!


表弟揀既菜式,
【Triple 大少奶's】  既burger
↓呢份最大表弟既~充滿肉汁攪到佢成手都係


↓大少爺的                                                                        ↓我的
 
↓自選配菜

↓椰汁焗西米布甸,落雙倍份量西米
今次用一隻非常彈牙既西米,攪到個布甸非常彈牙

仲有心太軟

↓比表弟帶番屋企既蛋糕,舅父舅母話呢隻原味戚風蛋糕好味!

我哋 一齊睇林海峰噴飯talk show、又玩啤牌,好開心咁過一日!

2007年2月21日 星期三

祝你:黃柑滿屋


今日下晝整小小甜點比大少爺食,係潮洲柑果凍
其實係大少爺好鍾意食柑,而屋企又無其他生果就用柑整
話時話今年聽到最開心既賀年說話係我表弟sms既祝賀
佢係祝我...豬事八掛、豬圓肉潤、豬多事實
我就祝佢...正豬錦春、發過豬頭
每年我都會鬥快祝福對方怪賀詞
雞年就...雞啄唔斷、雞犬不靈
狗年就...狗唔搭八、狗菜豬紅..........
今年我遲咗輸咗,我而家開始諗出年賀詞,出年一定要贏番佢,哼!




2007年2月20日 星期二

浮誇椰汁年糕


再開新post係因為之前有人回應,我唔忍心delete
但又好想炫耀呢個年糕所以開新post
今次依然只做一半份量但用比較細既模,效果及形態靚過上次
而且個金色背景比較浮誇但又襯到新年氣氛,好鍾意呀!


2007年2月19日 星期一

年初二


恭喜發財!
琴日去拜年
今日就留晌屋企煮開年飯,但未諗到煮乜好
新年前咁忙,而家又好想懶下
但一定要煮開年飯,煮乜好呢?
________________________________________________________________
1830hrs:開年飯
上湯金華火腿蒸班塊
做法:將班塊洗淨抹乾水用胡椒粉搽勻上碟,放上金華火腿上面
將半杯上湯加粟粉攪勻後淋上魚面蒸,蒸好隨意加蔥及芫茜




滑蛋蝦仁



南乳齋 (真係食足幾餐,好厭)



蘿蔔粟米煲瘦肉湯
大少爺話近排好滯唔好煲花膠,但我又唔覺花膠好滯呢



蓮子紅棗雪耳糖水
浸軟雪耳;紅棗、蓮子略浸煲到雪耳、蓮子稔身加冰糖



始終都無整雞,其實我尚努力鑽研中菜菜式
希望出年能夠鮑參翅肚樣樣皆能,大少爺你食住先啦!
相比以前日日出街食已經好好多呢!

2007年2月17日 星期六

恭賀新禧


    

                                         emoticon140.gif  
恭喜發財!
emoticon141.gif                      
                                              

                     龍馬精神 萬事勝意 南乳豬手 出入平安 瘋瘋癲癲
                     壽比南山 龍蝦沙律 身體健康 忌廉蛋糕 馬到功成
                     身壯力健 年年有餘 可口可樂 生意興隆 豐衣足食
                     雜果賓治 一帆風順 大吉大利 滑蛋蝦仁 快高長大
                     橫財就手 甘草話梅 帶結同心 于歸之喜 肉絲炒麵
                     鳳爪排骨 百年好合 大展鴻圖 金華火腿 弄璋之喜
                     明珠入掌 木瓜雪耳 相親相愛 酥皮蛋撻 緣訂三生 
                    佳兒佳婦 君子好逑 鮮奶燉蛋 美滿緣緣 唱隨諧樂
                    青春常註 笑口常開 新翁之喜 榴槤布甸 永懷德風
                    財源廣進 樂賦唱隨 聖誕快樂 珠圓肉潤 財色兼收
                    不勞而獲 學業進步 天賜良緣 心想事成 白頭偕老
                    永浴愛河 駿業宏開 福如東海 年年歡樂 歡樂年年
                                            大少爺、大少奶同人敬賀!Yeah!

回復真我團年飯


早照鏡下巴既暗瘡已經好番七七八八、呢兩晚瞓得好好眼圈減淡
生理期影響既水腫消失
加上琴晚
emotion27.gif ,我終於回復真我喇!心情都特別好


終於唔駛樣衰衰過新年,Yeah!!!
emoticon90.gif

琴日已經買定餸,都幾難諗架!中菜我有好多唔識呢
去Citysuper買虎蝦、之後諗唔到,見塊面好返牛魔王即回歸
二人世界團年飯
茄汁乾煎蝦



金蒜燒汁焗肥牛金菇卷



南乳炆齋




椰子海底椰紅蘿蔔粟米南北杏蜜棗煲瘦肉



甜品:金光燦爛糖不甩



↓預備中


________________________________________
呢隻係我平時好殘、皮膚變差既時候用,連眼都可以用
我已經用呢隻面膜五年喇,用完一瓶又一瓶
不妨考慮下,敷住沖涼蒸氣令佢更吸收
琴晚大少爺話我塊面有番光澤都靠佢
勁推介    ---->>

2007年2月16日 星期五

新年準備


年廿九喇!剛好蒸多底糕,聽日整團年飯呢
全盒、利是都已經準備好喇!
下面呢隻朱古力係我最愛?每逢聖誕、新年百佳先有得賣
平時只有晌各地既機場duty free先買到,仲要$90一盒(唔同國家唔同包裝)
但過年$79.9有兩盒 ,300g一盒
             
香滑黑朱古力包著軟滑既榛子軟心朱古力
                                  
裡面有張紙條有唔同語言,每粒內容都唔同,呢粒係........
In dreams, as love, all is possible        
                                                         
我既全盒,由第一年同大少爺同居至結婚都用呢個全盒



                       
有Baci,樂家杏仁糖、傳統白兔糖、瑞士糖
           
第二層糖冬瓜、糖椰角
                                 
                                                        

唔同面額利是
大少爺要派開工利是比下屬,中間最醜樣【喜】字利是封係開工利是
其餘要派唔多,因為朋友多數已結婚、大多未有仔女
不過呢度都只係少部份,仲有好多封無出鏡呢!