2006年8月28日 星期一

笑聲中既晚餐


今日表弟來食晚餐,每次見到佢我都好開心!大少爺亦都好喜歡佢
印象中佢係我人生第一個朋友仔,我大佢十個月,我懂性開始就認識佢,係由細玩到大既玩伴
我地坐埋一齊會笑唔停,今晚又一路笑一路食喇!
佢來食飯要隆重其事,可惜個pizza皮今次整得唔好,焗出來勁醜樣
等我介紹下啦!
而今晚菜單有:
頭盤:豬頸肉泰式海鮮沙律
主菜:雙重芝士pizza
           日式吉列蝦
甜品:焗西米布甸
↓豬頸肉泰式海鮮沙律



↓日式吉列蝦



↓發酵中既麵糰

↓before baking
制成品!好核突


焗西米布甸



2006年8月27日 星期日

清新頭盤:蟹柳芝士蕃茄卷


今日留晌屋企抖抖,睇志雲飯局,今集既嘉賓係:狄娜
首先…唔好討論狄娜身材同艷情片
佢晌我眼中係一個非常有智慧既女人而且非常豁達
有文化修養、談吐大方,舉止優雅及有性格,我覺得佢好叻,佢既訪問令我好深刻
全個訪問包括有佢既家庭、與佢孩子既親情、事業、拍電影既經過、佢對國家既感情
訪問中不自覺地顯露佢既智慧
當節目尾聲時佢講出對婚姻既睇法
佢話:婚姻係一場永不休止既辯論、愛一個人係需要妥協,愛情最大既快樂係付出
我覺得無錯,兩個唔同家庭、環境既男、女要走埋一齊係需要妥協
而為愛付出亦係理所當然
+++++++++++++++++++++++++++++++++++++++++++++++++++++++++++
通常如果要整西餐我係會整埋頭盤,今日介紹易做頭盤
主菜唔駛講都知我會整 steak
呢個蟹柳芝士卷係非常易做,個卷既做法係參考blog友紫羽嫣既可麗卷(亦都多謝佢提供做法)
我覺得頭盤最好較清淡所以就無做醬汁,餡料用蟹柳、蕃茄粒、洋蔥、同少少芝士
內餡係唔駛煮,因為包好後我會放焗爐焗一陣,咁做表面會香脆少少
而且會令芝士溶化,蕃茄會保持鮮甜、洋蔥會散發香味,唔用汁食就比較清新
如果你地鍾意可以加沙律汁,又可以自已加鍾意配料diy
不過…雖然我好鍾意食芝士但唔好落太多,我覺得頭盤唔好太heavy
面皮材料:參照紫羽嫣可麗餅食譜
麵粉   50g
蛋       1隻
奶       50ml
牛油溶液    1湯匙
做法
將蛋、牛油同奶完全拌勻,麵粉過篩加入拌至無粉粒
燒熱平底鑊加油牛油,將麵糊平均倒入成圓形,慢火煎到金黃色
加入餡料包起,放入焗爐焗到表面少少乾身
如擔心粉粒唔勻可用篩隔一次
我自已覺得放入焗爐焗一陣塊皮更好味!不過…唔焗一樣得!
餡料隨自已喜歡而定



2006年8月26日 星期六

第100篇


原來短短兩個幾月就已經100篇網誌喇!
今日又揀Soho區食Lunch,但選擇另一間餐廳,不過唔記得叫咩名
佢個門口係用一個大魚缸做牆,好易認
下晝得一檯客人,又可以公然影相唔怕臉紅,星期六晌soho區食lunch係寫意既選擇
我12點幾行IFC已發現日本餐廳"千兩"有人龍排隊
呢間既食物賣相比較精美,美中不足既係肉眼扒唔夠嫩(我發覺自已真係牛魔王,一見menu係牛諗都唔諗就order),但件cheese cake令人十分滿意
食完就開始慣性shopping但全日既收獲只係幫大少爺晌A/X買兩件秋季衫
其餘乜都無,因為我今日生理狀況影響購物慾
連帶同行既"忌廉bun小姐"都無收獲,簡直反常呀
行到尖沙咀就去 super sandwich食晚餐,貪夠方便唔駛等位,揀熱狗、caesar salad套餐
頭盤:芒果蝦沙律

主菜:燒肉眼扒            

甜品:我至愛既cheese cake

晚餐:熱狗、caesar salad套餐@ super sandwich


2006年8月24日 星期四

又再摷雪櫃.......蒜蓉牛油焗蘆筍魚卷


急不及待post上來,因為我又有新既摷雪櫃傑作
話說今日下晝整果幾個 pretzel整好耐,塊麵糰仲難過整pizza
整完又累唔想落街,又唔想出街食喎!
就打開雪櫃諗餸,開冰箱有雪藏魚柳、有近來必有既蘆筍、仲有整pizza用剩既火腿
就用火腿卷著魚柳同蘆筍,魚柳溶雪用鹽同胡椒塗勻就用得,蘆筍略炒
如果驚個卷唔實就用牙纖固定,落2湯匙雞湯加少少牛油溶液同蒜頭放焗爐
就整左以下既魚卷喇!味道好好呀!因為牛油同蒜頭已經夠味好香唔駛再煮汁
用焗爐煮餸首先用錫紙蓋面焗就會易熟又唔會乾身
想香口就晌熟既時間開錫紙再焗到理想金黃色,咁就唔怕焗乾或裡面唔熟




2006年8月22日 星期二

盆裁豆腐


剛過去既一星期,忙得團團轉
因為有一個特別既gathering要準備好多野,屋企又好似特別多野處理咁
琴晚點住香薰沉沉訓了一覺,今日覺得特別精神
呢個星期好想好好休息一下
我係一個好奇怪既人,如果你比一碟豆腐同菇我,未必引起我食慾
一定要裝飾下先會開心
我將豆腐蒸熟中間挖空,將菇略灼再炒釀入豆腐中間
最後加日式鰻魚汁,就變成不平凡豆腐,好似一個盆裁呀


2006年8月21日 星期一

理想世界


今日去了一個特別既Gathering,返到屋企都十一點幾
返到0黎仍興致勃勃整木糠布甸
一個極易做既甜品,想到用透明酒杯裝著可以睇到層次感
鍾意分明既感覺......................
做人處世好難做到黑白分明,好多事情中係會有灰色地帶
唯有利用呢個甜品做出我目中既理想世界
材料:
瑪利餅      200g
可可粉        2湯匙
忌廉          250g
煉奶          80g
雲呢拿香油
做法:
將餅用攪拌機打碎或用匙壓碎,畢起小杯與可可粉混合
將忌廉打至杰身加入煉奶、能雲呢拿油再打至軟雪糕狀
將餅碎與忌廉梅花間竹入杯最面層用混有可可粉既餅碎舖上之後雪凍
呢個食譜我自已改良過,因為鍾意多d餅就加至200g
我覺得煉奶好甜無再加糖,做法參考為食貓



2006年8月18日 星期五

估佢唔到


近來好似好興整"芒果糯米慈"
睇睇食譜心想.........哦!好易之嘛!
跟住今早出門時就已經打算返屋企時買材料整,順便用埋剩下既椰絲
做既過程好容易,但係當我要將糯米糰搓圓入芒果餡時就出現問題
要將糯米糰搓得好好睇睇有一定難度,糯米糰係強頑無比既
同埋要整到皮薄都非易事,好容易變得厚厚!
我要認輸喇!仲要輸比我眼中以為無難度既糯米慈



2006年8月16日 星期三

愛極愛、怕極怕


呢個"椰塔"
佢係軟身既~唔係脆既,但係味道真係好好好香椰子味
佢只需要用蛋白、椰絲、糖製造
但椰絲呢樣0野係令人.............愛極愛、怕極怕
食譜     預熱 170度
蛋白     3隻
糖        2~3湯匙
椰絲      40g或隨意加多或減少
做法
蛋白與糖打起加椰絲拌勻,放入唧袋唧出形狀放入焗爐至金黃,取出放涼
呢個餅係軟身充滿椰絲口感既,唧既時候預留位置因會脹大
會有少少黐手,可能底部會黐盤,用刀輕輕由底部刮出



2006年8月15日 星期二

你快樂所以我快樂 (已加食譜)


我本身鍾意紫色,細個既時候係沉迷紫色,買糖一定買黑加侖子味
但唔記得幾時開始轉了口味鍾意食士多啤梨味
而整呢個黑加侖子綿花糖係因為大少爺鍾意黑加侖子味
其實....如果倆個人既口味唔同
我寧願放棄自已鍾意既味道而迎合佢或者嘗試接受佢喜歡既味道
【你快樂所以我快樂】呢個係大少奶精神
+++++++++++++++++++++++++++++++++++++++++++++++++++++++++++++
棉花糖食譜
0者喱粉一盒(可以隨自已口味選擇)
蛋白  3隻
糖     1茶匙
魚膠粉   5茶匙(我覺得可以加多少少,因為我整呢個覺得唔夠實加多1茶匙好d)
熱水   半杯
飲用水 半杯
椰絲適量
做法:
1)將蛋白打至企身
2)將魚膠粉、0者喱粉、糖用熱水調開攪勻,再加飲用水
3)將0者喱粉水加入蛋白再打至企身(約10分鐘)
4)倒入平底盤或膠盒雪至凝結,切糕加椰絲
我覺得呢個要放雪櫃,唔好諗住帶出街請人食呀!會溶既~
糖唔好加太多因為0者喱粉本身已經甜
雪耐d先好切!



星洲炒米



網上購物等送貨所以自已做午餐
一路都想試做星洲炒米
用咖喱醬同琴晚晚餐食剩既叉燒、洋蔥絲、急凍蝦仔整星洲炒米
我本身無期望急凍蝦會好鮮味,只係平常買定放冰格有時當點綴
但都無想過用滾水灼後會變到咁細粒,但味道都尚可
新加坡無見過星洲炒米,但當地既炒粿條卻令我思念


你地好眼利呀!連隻叉有圖案都睇到,我影呢張相等你地可以睇得清楚d!
大既係叉,細既係茶匙




2006年8月14日 星期一

就是喜歡........


就是喜歡........麵包沾有黑椒、由麵包開始已經係誠意之作
就是喜歡........內有芥辣
就是喜歡........係真正既cheddar cheese,並非一般片裝芝士,帶有紉性同濃濃香味
就是喜歡........係煙火腿,並不是普通三文治火腿
就是喜歡........放入焗爐翻熱後,麵包鬆脆、芝士香濃、火腿充滿煙薰香味
就是喜歡........唔係Delifrance或者 Pret A Manger,而係可以留晌屋企享受既
就是喜歡........在梗有一間晌左近既7-11售賣
就是喜歡........只賣$12.9一份
I'm Loving it!!!!!!!!!!!!!!!!!!!!!!



2006年8月13日 星期日

煲湯瘦肉做乜好?


煲完湯既瘦肉做乜好?通常因為塊肉變得【鞋】恰恰就會棄掉
其實可以做咖喱豬肉鬆/絲
參考"為食貓"食譜
首先將瘦肉撕成幼絲,放白鑊用慢火炒
再加咖喱粉、生抽、老抽、鹽、糖,份量視符口味
建議自已試味調教,落左調味後就繼續慢火炒期間不斷翻動
當發覺開始曲身就開始會變平時街外買模樣
再炒至乾身至微微香脆,可加少許芝麻或紫菜
放涼後放密實盒保存
自已做可調教味道,例如鍾意咖喱味就落多些少咖喱粉、又可以做到無咁鹹
全程唔需要加油只需要炒至乾身(千其唔好太大火會令肉絲變硬)
最大好處係…以後煲湯唔需要浪費塊瘦肉



想像是美好的....現實是殘酷的…腸仔卷是醜的


有酥皮用剩,就做小食啦!但做乜小食好呢?
就用埋雪櫃既芝士雞尾腸。一心諗住只係用酥皮包住腸仔無難度
仲卷得靚靚地入焗爐
點知........當入爐後酥皮澎脹,有d鬆開
之後雞尾腸受熱後仲爆開添,得呢幾個比較無咁衰樣咋
真係"想像是美好的…現實是殘酷的…腸仔卷是醜的"



2006年8月12日 星期六

同一地方……兩種感覺


十二點鐘已經開始行IFC,之後去食lunch
食完兩點幾行過尖沙咀行街
再到佐敦食澳洲牛奶公司
食完就去朗豪坊,返到屋企9點幾,隻腳累到唔似自已........
戰利品方便尚算滿意啦!買左4樣野咁啦!
今日再到Soho區既英國餐廳 "Refectory"同上次一樣揀食 Rib eye steak,因為今次居然無Fish & chips!
個沙律唔同上次,今次個沙律有魷魚而且好鮮味
麵包布甸真係好似晌英國食既味,呢個仲無咁甜添!
頭盤:香橙魷魚野菜沙律
主菜:炭烤肉眼扒配香草牛油
甜品:麵包布甸
各方面都好滿意!最開心呢個時段餐廳無乜人,影相唔會難為情 good~
 我鍾意下午既Soho區夠寧靜,香港實在太擠逼喇!特別係星期六、日人頭湧湧好難搵到清靜既地方
Soho區晚上十分熱鬧相反日頭就有一種悠閑既感覺








2006年8月9日 星期三

一個人的快樂午餐


女人係變幻無常,早兩日晌CWB既日本吉列專門店食晚餐
吉列生蠔令我念念不忘,本想今晚再去食晚餐
好奇怪!突然又唔想出去喇!因為好悶熱好焗呀
到而家仲未決定晚餐食乜
但係午餐已經消化0左喇!就係吞拿魚酥
整蝴蝶酥用剩酥皮,就整三個吞拿魚酥
用蛋撻模cut,個型狀幾靚丫!
經常一個人午餐,花少少心思令自已開心
我係一個勁貪靚既人,連自已一個人食既午餐都希望靚,食得開心d





2006年8月8日 星期二

Fruit tart


今日整fruit tart,整之前幻想自已會做出靚樣既tart
砌生果原來係一門學問
買唔到切好一塊塊既罐頭桃,只好買粒裝既桃
菠蘿又貪方便買粒裝,但打開罐粒粒菠蘿都好大粒,奇異果自已切好d
藍梅就好甜,我唔太鍾意食但佢可以抗氧化對眼睛又好
個批皮同雞批皮無論材料做法都一樣只需加多10g糖霜
吉士係用吉士粉加奶煮成,做法容易但需要好多心機
↓呢個最滿意,其他就..........................OK!尚可接受啦!





瘋戀三文魚


好多時都係一個人食午餐,我會選擇大少爺唔鍾意食但我又好鍾意既食物
而呢碟係我最鍾意既煙三文魚沙律
自從大約六、七歲第一次食煙三文魚後我就瘋狂地愛上
我爸爸生前同我都好鍾意煙三文魚,爸爸以前既上司多數係洋人
所以口味與作風都很洋化,而我既口味同佢係好一致
一包煙三文魚就逗得我倆父女高興
相反媽咪雖然已經差不多遊歷全世界,但口味就中國化很多!甚至抗拒西餐
早兩年舅父從加拿大回流返香港送左一包好大包既煙三文魚比我
我收到後連續兩日既三餐都只食煙三文魚
而上年我收到既生日禮物當中,聰明既表弟送煙三文魚比我,令我好開心既生日禮物!
其實三文魚無論生食、煙燻、熟食都一樣鍾意,我確實係三文魚狂!



2006年8月7日 星期一

報紙鹹濕版?


下晝有約,晚餐會等大少爺放工出外食
今日廚房休息一日,聽日會嘗試整新食物喇!
屋企屬于私人空間所以唔會影出來,但我經常想post下屋企既無聊收藏
↓報紙既鹹濕廣告版?


用鹹濕報紙墊mouse?

其實係mouse pad

睇清楚內容係唔鹹濕架!

呢塊mouse pad係我晌 【G.O.D住好0的】買,好鍾意呢個報紙 pattern
呢個報紙pattern有床單、枕袋、甚至女裝手袋、男裝孖煙通、好多好多
曾有衝動想買床單套裝,一套要$850,但被大少爺潑冷水買唔成
佢話:唔鍾意睡在報紙上
有d朋友話同報紙無分別?點解我咁鍾意?
我覺得佢地太認真喇!!我係鍾意設計者果份幽默感


2006年8月4日 星期五

雪櫃後勤應急支援者..........雞翼


雪櫃後勤應急支援者.........雞翼
雪櫃唔可以無可樂
,同雪藏雞翼

昨日為例.......被困屋內,有雞翼就可以解困啦
雪藏雞翼溶雪後要用粗鹽水浸去雪味
其實我唔太鍾意食雞翼因為實在太多皮喇!我整雞翼通常放入燒烤微波爐整燒雞翼
因為燒會令雞翼皮油份逼出,可以做到香脆而皮無油
而且用燒烤微波爐燒雞翼唔駛洗鑊
下圖既雞翼只係用鹽焗雞粉醃再燒,完全係方便呀!